سیمپل میں خرابی کے باعث آرڈر کی منسوخی پر سیمپل اخراجات کا حکم

سوال

ہمارا ایک تجارتی ادارہ ہے اور ہم مختلف اقسام کے گارمنٹس تیار کر کے بیرونِ ملک ایکسپورٹ کرتے ہیں۔ گارمنٹس پر مختلف ڈیزائن بھی بنائے جاتے ہیں۔ یہ ڈیزائن ہم خود منتخب نہیں کرتے بلکہ ہمارا خریدار ہمیں ڈیزائن دیتا ہے جو ڈیجیٹل تصویر کی صورت میں ہوتا ہے اور ہم اس کو کپڑے پر پرنٹ کرواتے ہیں۔ پر نٹنگ ہمارے ادارے میں نہیں کی جاتی ہے بلکہ اس کے لئے پرنٹنگ فرم کی خدمات حاصل کی جاتی ہے۔

ہم پر نٹنگ فرم کو تیار شدہ ڈیزائن کی تصویر دیتے ہیں، ان کی طرف سے پہلے بطور نمونہ اس ڈیزائن کا تقریبا A4 سائز کے برابر کپڑا تیار کیا جاتا ہےگارمنٹس کی لائن میں اس کو Strike offs کہتے ہیں اور اس کا کوئی معاوضہ نہیں ہوتاStrike offs تیار ہونے کے بعد ہم خود بھی اس کوچیک کرتے ہیں اور اپنے خریدار (جس کے لئے گارمنٹس تیار کیا جارہا ہے) کو بھی دکھاتے ہیں، اگر وہ اس کو قبول کر لیتا ہے تو ہم اس کو پاس کر کے پر نٹنگ فرم کو پرنٹ کا آرڈر دیدیتے ہیں۔

اس موقع پر ہمارے اور پر نٹنگ فرم کے درمیان یہ بات understood ہوتی ہے کہStrike offs اور بعد میں کپڑے پر ہونے والے پرنٹ میں انیس بیس( تقریبا دس پر سنٹ) کا فرق ہو سکتا ہے کیونکہ Strike offs ٹیبل پر( مینول طریقے سے) سے تیار ہوتا ہے اور اصل پرنٹ مشین کے ذریعے ہوتا ہے۔ جب ہم Strike offs پاس کر کے پرنٹ کا آرڈر دیتے ہیں،آرڈر میں ایک تو پر نٹ کے چارجز ہوتے ہیں جوPer KG کے حساب سے طے کئے جاتے ہیں اور دوسرا پرنٹنگ فرم مشین پر پرنٹنگ کےلئے پہلے اس ڈیزائن کی جالی (سکرین / فلم) بناتے ہیں، جالی (سکرین / فلم) بنانے کے علیحدہ سے چار جز مقرر ہوتے ہیں البتہ جالی کے سلسلے میں پر نٹنگ فرمز کے ہاں اصول یہ ہے کہ اگر اس ڈیزائن میں ہزار کلو گرام سے زیادہ مال پرنٹ کروانا ہو تو ایسی صورت میں وہ جالی (سکرین / فلم)کے چار جز وصول نہیں کرتے، بعض اوقات اس طرح بھی ہوتا ہے کہ کوئی مال ہزار کلو گرام سے کم ہونے کی وجہ سے جالی (سکرین / فلم) کی چار جز لگا دیئے جاتے ہیں لیکن اگر تین ماہ کے اندر اندر ( یہ دورانیہ مختلف پر نٹنگ فرمز میں کم و بیش ہوتا ہے ) اسی ڈیزائن میں مزید مال بنوالیا جائے اور یوں اس ڈیزائن کا کل مال ہزار کلو گرام سے بڑھ جائے تب بھی جالی (سکرین / فلم) کے چار جز ہمیں واپس کر دیئے جاتے ہیں۔
اس تمہید کے بعد عرض یہ ہے کہ ہم نے ایک پر نٹنگ فرم کے ساتھ ایک ڈیزائن بنانے کا معاملہ کیا، ( یہ معاملہ براہِ راست نہیں تھا بلکہ ایک بروکر کے توسط سے تھا) ان کی طرف سے اس ڈایزائن کا Strike offs تیار کیا گیا، یہ Strike offs بالکل بہترین اور ہمارے معیار کےمطابق تھا، ہم نے اپنے خریدار کو دکھایا تو اس نے بھی پسند کرتے ہوئے منظوری دی، لہذا ہم نے پرنٹنگ فرم کو جالی (سکرین / فلم ) تیار کرنےاور پر نٹنگ کا آرڈر دیدیا لیکن جب انہوں نے ابتدائی طورپر کچھ کپڑے پر مشینی پرنٹ نکال کر ہمیں دکھایا تو وہ ہمارے مطلوبہ معیار اور ان کی طرف سے ہمیں دکھائے گئے Strike offs سے بہت مختلف تھا، عموما جوانیسں بیسں ( تقریبا دس پر سنٹ) کا فرق آتا ہے، یہ اس سے زیادہ ہے(تقریبا 25 سے 30 پر سنٹ) اور اس فرق کی وجہ سے جو اصل ڈیزائن تھاوہ ہی چھپ گیا ہے (کیونکہ ایک کلر دوسرے پر پھیل گیا ہے)،لہذامطلوبہ ڈیزائن کے بر خلاف پرنٹ کی وجہ سے ہمارا کافی مقدار میں کپڑا بھی خراب ہو گیا، مزید نقصان سے بچنے کے لئے ہم نے ان کو مزید پرنٹ کرنےسے روک دیا اور ان کے ساتھ یہ معاملہ بھی ختم کر لیا۔

دوسری طرف چونکہ پر نٹنگ، فرم نے اس کی جالی تیار کی تھی اور کچھ کپڑا پرنٹ کیا تھا توان کا بھی گویا خرچہ ہوا۔چونکہ یہ کام ہم نے ایک بروکر کے توسط سے کیا تھا، اب صور تحال یہ ہے کہ بروکر ہم سے جالی (سکرین / علم) کے چار جز کا مطالبہ کر رہاہے ، اور ان کا کہنا یہ ہے کہ پر نٹنگ کی لائن میں رواج ہے کہ جب ایک مرتبہ جالی (سکرین / فلم ) بن جاتی ہے تو گاہک کو اس کے چار جز بہر حال ادا کرنے ہوتے ہیں، چاہے پرنٹ اس کے معیار پر پورانہ بھی اترے، دوسر اوہ یہ بھی کہہ رہے ہیں کہ یہی ڈیزائن ان سے ایک اور ادارہ نے بھی بنوایا تھا جو اسی طرح سے (یعنی اصل ڈیزائن سے فرق کے ساتھ ) آیا جو آگے ان کے خریدار نے قبول کر لیا تھا لہذا انہوں نے سوچا کہ ہمارا خریدار بھی اس کو قبول کرلے گا۔ جبکہ ہماری طرف سے ان کو کہا گیا کہ آپ کی طرف سے جو Strike offs ہمیں پیش کیا گیا اس میں اور اس پرنٹ میں جو فرق آیا ہے وہ عام طور پر آنے والے فرق سے بہت زیادہ ہے جس کی وجہ سے ہمارا کپڑا بھی ضائع ہو گیا ہے، اور ہمیں یہ بات بھی معلوم ہے کہ ہمارا خرید ار اس فرق کو کبھی بھی قبول نہیں کرے گا۔
اس حوالے سے درج ذیل امور میں شرعی رہنمائی مطلوب ہے:
1. کیا درج بالا صور تحال کے پیش نظر بروکر /پر نٹنگ فرم کا ہم سے جالی (سکرین / فلم) کے چار جز کا مطالبہ کر ناشر عا ً درست ہے ؟
2. اگر پرنٹنگ فرم کی طرف سے کسی ڈیزائن کا با قاعد ہ Strike offs نمونہ بنا کر دکھایا جائے اور پھر بعد میں اس کے مطابق کئے گئےپرنٹ میں اگر عرف میں قابل برداشت فرق سے بھی زیادہ فرق آجائے تو کیا ایسی صورت میں پر نٹنگ فرم کا ہم سے جالی (سکرین /فلم) کے چارجز کا مطالبہ کرناشر عادرست ہے ؟ اور اگر ہے تو کس قدر ؟

3. پر نٹنگ فرم جب کسی مال کی جالی (سکرین / فلم) تیار کرنے کے بعد پر نٹنگ کا عمل شروع کرتی ہے اور کچھ مال پرنٹ بھی کر دیتی ہےلیکن وہ مطلوبہ معیار کے بر خلاف ہو جس کی وجہ سے گار منٹس کمپنی اس آڈر کو کینسل کر دے تو اب تک کی پرنٹنگ کا جو خرچہ ہوا ہےاس کا کیا حکم ہو گا ؟

4. اسی طرح مطلوبہ معیار کے بر خلاف پر نٹنگ کی وجہ سے ہمارے کپڑے کا جو نقصان ہوا ہے کیا شرعا ًپر نٹنگ فرم کو اس کا ذمہ دار قراردیا جا سکتا ہے؟

5. اس معاملے میں مارکیٹ میں رائج مختلف عرف مثلا جالی (سکرین / فلم) کے پیسے بہر حال دینے ہی ہوتے ہیں، پرنٹ خراب آنے کی وجہ سے جتنا کپڑا پرنٹ ہو جائے اس کے چار جز پر نٹنگ فرم وصول نہیں کرتا اور کپڑے کی قیمت کا نقصان بھی ادا نہیں کرتا، شرعاً ان کا کیاحکم ہوگا؟

6. اگر فریقین کا اختلاف ہو جائے پر نٹنگ والا کہے کہ یہ انیس بیسں کا فرق ہے جو کہ مارکیٹ میں چلتا ہے جبکہ گار منٹس والے اس کو انیس بیسں سے زیادہ فرق بتائیں تو ایسی صورت میں فیصلہ کیسے ہو گا ؟

7. جیسا کہ اوپر ذکر کیا گیا کہ پر نٹنگ فرم جانب کسی بھی ڈیزائن کا ابتدائی نمونہ مینول طریقے سے بنایا جاتا ہے لیکن اصل پرنٹنگ مشین پر ہوتی ہے جس کی وجہ سے دونوں میں فرق ہو جاتا ہے، یہ معاملہ کرتے ہوئے شرعاً کن امور کا لحاظ رکھنا چاہئے تا کہ آئندہ اختلاف سے بچا جا سکے؟
وضاحت:سائل نے بتایا کہ جالی تو انہوں نے ٹھیک بنائی تھی لیکن پرنٹنگ کے پروسس کے دوران پرنٹ کے کلر ایسے خلط ملط ہوگئے کہ ایک رنگ دوسرے میں مل گیا ،سائل نے مزید یہ بتایا کہ پرنٹنگ فرم والوں نے اس جیسی پر تنگ ہم سے پہلےکسی اور کیلئے بھی کی تھی، اس میں بھی اتنا فرق آیا تھا۔ البتہ پرنٹنگ فرم والوں نے اس فرق کے ساتھ اس کمپنی سے وہ پرنٹ قبول کرایا تھا اور ہمارے بارے میں بھی یہی گمان تھاکہ ہم بھی پرنٹ کو اس فرق کے ساتھ قبول کر لیں گے اور جب ہم آرڈر دے رہے تھے توہمیں یہ نہیں بتایا کہ اس جیسی پرنٹنگ میں نمونہ والی پرنٹ اور بعد والی پرنٹ میں دیگر پرنٹنگ کے مقابلے میں زیادہ فرق آتا ہے جس کی وجہ سے ہماری دی گئی پرنٹنگ میں بھی فرق آیا۔اور پرنٹنگ فرم کے بقول جالی مخصوص صورت حال میں مثلاً مشین خراب ہو جائے اور گارمنٹس کمپنی آرڈر کینسل کر دے تو گارمنٹس کمپنی اس جالی کو کسی اور پرنٹنگ فرم سے پرنٹنگ کرانےکیلئے بھی لے جا سکتی ہے، اور ڈیزائن کی وجہ سے اس جالی کو پرنٹنگ فرم والا کسی دوسرےگارمنٹس کمپنی کے کپڑوں میں استعمال نہیں کر سکتا۔ البتہ گارمنٹس کمپنی کے بقول ہمارے ساتھ ایسا نہیں ہوا کہ ہم نے پرنٹنگ فرم والے سے جالی لے کر کسی دوسرے پرنٹنگ فرم والے کو دی ہو یا وہ جالی کسی اور گاہک کے استعمال کے سلسلے میں ہم سےاجازت طلب کی ہو اور شاید یہ اصول ہو لیکن ہمیں اس کا علم نہیں ہے۔اور مذکورہ مسئلہ میں جالی اگر چہ صحیح بنائی تھی لیکن اس جیسی پرنٹنگ میں رنگ پھیل ہی جاتا ہے لہذا مذکورہ گارمنٹس کمپنی کیلئے یہ جالی کسی کام کی نہیں ہے۔

جواب

(1،2،5)۔۔۔ سوال میں ذکر کردہ وضاحت کے مطابق جب پرنٹنگ فرم نے گارمنٹس کمپنی کے آرڈر پر اس کےمطلوبہ معیار کے مطابق صحیح جالی بنائی، اور اس جالی کو پرنٹنگ فرم کسی دوسرے گار منٹس کمپنی کے کپڑوں میں اس کی اجازت کے بغیر استعمال بھی نہیں کر سکتا بلکہ یہ جالی مخصوص اس کمپنی کے لئے بنائی ہے، تو ایسی صورت میں اس جالی کے اخراجات گار منٹس کمپنی کے ذمہ ہوں گے ، اور مذ کو رہ جالی گارمنٹس کمپنی کی ملکیت شمار ہو گی۔

(3،4)۔۔۔مسئولہ صورت میں جب پرنٹ کیلئے دیے گئے کپڑوں پر مطلوبہ معیار کے خلاف پرنٹ کیا گیا اور کپڑوں کے ضائع ہونے کے خوف سے مذکورہ معاملہ منسوخ کر دیا گیا تو اس صورت میں گارمنٹس کمپنی کو دو اختیار حاصل ہوں گے۔
پہلا یہ ہے کہ گارمنٹس کمپنی مذ کو رہ پرنٹ شدہ کپڑے پر نٹنگ فرم کے حوالہ کرے اور اس سے اپنے کپڑوں کےعوض سفید کپڑے یا اس کی قیمت لے لے۔

دوسرا اختیار یہ ہے کہ گارمنٹس کمپنی ان پرنٹ شدہ کپڑوں کو خودر کھلے جس پر پرنٹ مطلوبہ معیار کے خلاف ہواہے، اور پر نٹنگ فرم کو اس پر نٹنگ کے بدلے اجرتِ مثل (اس جیسے کام کی عام طور پر عرف میں میں جو اجرت دی جاتی ہے )دیدے بشرطیکہ وہ اجرت مثلی اس اجرت سے زیادہ نہ ہو جو عقد اجارہ کے وقت طے ہوئی ہے۔

البتہ اگر پرنٹنگ فرم نے پرنٹ کی وجہ سےکپڑوں میں نقص پیدا کر دیا ہو جس کی وجہ سے ان کپڑوں کی قیمت کم ہوگئی ہو تو اس صورت میں اگر گار منٹس کمپنی دوسری صورت یعنی پرنٹ شدہ کپڑے لینے کو اختیار کرے تو گار منٹس کمپنی کیلئے جائزہے کہ وہ پرنٹنگ فرم سے کپڑوں میں ہونے والے نقصان کا ضمان لے لے یعنی پر نٹ کی وجہ سے کپڑوں کا جو نقصان ہوا اس کا پر نٹنگ فرم سے تاوان لے اور اس صورت میں اجیر کو اجرت نہیں ملے گی۔(3،4)

(6)۔۔۔مسئولہ صورت میں جب فریقین کے درمیان کپڑوں پر پرنٹ مطلوبہ معیار کے مطابق ہونے اور نہ ہونےمیں اختلاف ہوگیا تو اس بارے میں مذکورہ صنعت کے ماہرین اور تجربہ کاروں سے فیصلہ کروایا جائے اور ان کی رائے کے مطابق حل کیا جائے۔(6)

(7)۔۔۔ مذکورہ صنعت کے بارے میں ہمیں تفصیلی علم نہیں ہے، اس لیے کوئی حتمی جواب دینا ممکن نہیں، البتہ شرعی لحاظ سے معاملات میں صفائی رکھنا ضروری ہے، اور معاملات اس طرح طے کئے جائیں کہ بعد میں جھگڑے اور نزاع کی نوبت نہ آئے لہٰذامذکورہ معاملہ کرتے وقت بھی کام کی مکمل تفصیل اور وضاحت کرنی چاہیے۔