شراکت داری معاہدے کی شرعی حیثیت

سوال

درج ذیل مسئلہ کے بارے میں ہماری رہنمائی فرمائیں:

آج سے تین سال قبل ہمارے والد صاحب نے تقریباً ایک کروڑ روپے کی رقم ہم چار بہن بھائیوں (ایک بھائی، تین بہنیں) کو دی تا کہ اس کےساتھ کاروبار کیا جائے ، یہ رقم والد صاحب نے مجھے دی تھی تاکہ میں اس کے ذریعے سے کاروبار کروں ، یہ رقم درج ذیل شرائط کے ساتھ دی تھی اورایک معاہد ہ نامہ بھی باہمی رضامندی سے طے کر وایا تھا ۔

اس رقم کے ساتھ کاروبار کیا جائے گا (جو کہ معاہدہ نامہ کی شرائط کے مطابق ہو گا)جب تک اس رقم کے ساتھ کاروبار کیا جائے گا، اس کا نفع درج ذیل تناسب کے ساتھ تقسیم ہو گا:

1) (یعنی بھائی) ٪34
2) (یعنی(یعنی بہن) ٪22
3) (یعنی(یعنی بہن) ٪22
4) (یعنی(یعنی بہن) ٪22

اسی طرح نقصان ہونے کی صورت میں مندرجہ بالا نسبت سے ہر شریک نقصان برداشت کرے گا۔ اگر کسی وجہ سے کاروبار ختم کیا گیا اور سرمایہ تقسیم کرنے کی نوبت آگئی تو سب سے پہلے کاروبار پر ہونے والے قرض اور دیگر واجبات کی ادائیگی کی جائے گی ، اس کے بعد جو بھی کاروبار کی جو صور تحال ہو گی (خواہ نفع کی حالت میں ہو یا نقصان کی حالت میں ) کاروبار تحلیل کرنے کے بعد جو رقم حاصل ہو گی وہ سب شرکاء میں برابر تقسیم ہو گی۔معاہدہ نامہ کی بنیادی شقیں یہی ہیں، اس لئے ان کی وضاحت کر دی گئی، آپ سے التماس ہے کہ مندرجہ بالا معاہدہ میں شرعی لحاظ سے کوئی خرابی ہو تو اس کی نشاندہی فرمادیں اسی طرح اس میں اگر کوئی شق خلاف شریعت ہو تو اس کو بھی واضح فرمادیں۔ جزاکم اللہ خیرا

جواب

معاہدہ نامہ میں جو یہ بات ذکر کی گئی ہے کہ جب بھی کاروبار تحلیل کیا جائے گا اس وقت واجب الاداءر قوم وغیرہ کی ادائیگی کے بعد جو رأس المال اور منافع بچے وہ تمام شرکاء (بھائی بہنوں ) میں برابر برابر تقسیم ہو گا اس سے معلوم ہوتا ہے کہ والد صاحب نے رقم تمام اولاد میں برابر برابر ہبہ کی ہے اوراس طرح ہبہ کرنا حضراتِ صاحبین کے نزدیک جائز ہے، لہذا تمام شرکاء اس رقم میں برابر کے شریک ہیں،البتہ والد صاحب نے بھائی کو بہنوں کی طرف سے کاروباری معاملات چلانے کی ذمہ داری سونپ دی ہے اور کاروبار میں ہونے والے نفع و نقصان کی تقسیم کے لئے دو ضابطے مقرر کئے ہیں:

ایک تو یہ کہ کاروبار کے درمیان جب نفع تقسیم کیا جائے تو بھائی کو بہنوں سے زیادہ مقدار ملے گی ، یعنی بھائی کو 34 فیصد نفع ملے گا اور بہنوں کو 22، 22 فیصد نفع ملے گا اور اسی تناسب سے یہ حضرات نقصان بھی برداشت کریں گے۔

البتہ کاروبار کے اختتام اور تحلیل کے وقت نفع کی مقدار تو طے کر دی گئی ہے کہ وہ برابر برابر تقسیم ہو گا لیکن خدانخواستہ اس وقت اگر کوئی نفع نہیں ہوا ہو بلکہ نقصان ہوا ہو تو اس کے بارے میں کچھ طے نہیں کیا گیا، خلاصہ یہ کہ نفع کے لئے دو مختلف معیار مقرر کئے گئے ہیں جبکہ نقصان کے لئے ایک ہی معیار مقرر کیا گیا۔

جہاں تک نقصان کی بات ہے تو شرعا ًیہ بات لازم ہے کہ ہر شریک اپنے لگائے گئےسرمائے کے مطابق ہی ذمہ دار ہے، اس سے کم یازیادہ کی شرط لگانا صحیح نہیں لہذا صورت مسئولہ میں چونکہ ہر شریک کی طرف سے لگایا گیاسرمایہ برابر ہے اس لئے ایک شریک یعنی بھائی کے ذمہ 34 فیصد نقصان کی شرط لگانا درست نہیں،یہ شرطِ فاسدہے لیکن چونکہ شرطِ فاسد کی وجہ سے شرکت فاسد نہیں ہوتی اس لئے صورت مسئولہ میں شرکت کا معاملہ درست ہے۔ تاہم یہ شرط باطل اور لغو ہے یعنی اس شرط پر عمل نہیں کیا جائے گا بلکہ نقصان کی صورت میں ہر شریک اپنے اپنے لگائے ہوئے سرمایہ کے بقدر ہی ضامن ہو گا۔

البتہ نفع کے لئے معاہدہ میں جو یہ بات طے ہوئی ہے کہ کاروبار کے درمیان بھائی کو ۳۴ فیصداور بہنوں کو ۲۲ فیصد ملے گا اور کاروبار کے اختتام پر ان شرکاء کو نفع برابر برابر تقسیم ہو گا تو یہ اس میں بظاہرشرکت کے کسی بنیادی اُصول کے مخالفت لازم نہیں آتی ، لہذا اس طرح نفع طے کرنا بھی جائز ہے۔ نیز چونکہ کاروبار چلانے کی تمام ذمہ داری بھائی پر ہے، اس لئے باہمی رضامندی سے اس کے لئے زیادہ نفع طے کرنا جائزہے۔ (دیکھیں عبارات: 1،2)

باقی معاہدہ نامہ کے دیگر کالم میں ذکر کردہ شرائط درست ہیں البتہ کالم نمبر (۱۴) میں ایک بات کا اضافہ ضروری ہے ، وہ یہ کہ تنازعہ کے وقت جس شخص کو ثالث اور محکم کے طور پر مقرر کیا گیا ہو اس کے فیصلہ پر عمل اس وقت ضروری ہو گا جب کہ وہ شریعت کے کسی حکم کے مخالف نہ ہو، ورنہ اس فیصلہ پر عمل کر نالازم بلکہ جائزنہیں ہو گا۔

اسی طرح کالم نمبر (۲۱) میں جو طے کیا گیا ہے کہ جن معاملات کے متعلق اس معاہدہ میں کوئی بات ذکر نہیں کی گئی ہے ان کا فیصلہ ۱۹۳۲ کے ایکٹ کے تحت کیا جائے گا، اس میں بھی یہ بات ملحوظ رہے کہ اس ایکٹ کے ذریعہ کیا گیا فیصلہ بھی شرعاً اسی وقت واجب العمل ہو گا جبکہ وہ شریعت کے مطابق ہو، لہذا اگر بالفرض اس ایکٹ کی کوئی شق شریعت کے خلاف ہو تو اس کے لئے عدالت سے رجوع نہ کیا جائے۔

یہ بھی واضح رہے کہ اس کاروبار کے ذریعہ حاصل ہونے والا نفع اسی وقت حلال ہو گا جبکہ کمپنی کا اصل کاروبار بھی جائز اور حلال ہو اور اس میں تمویل کے طریقے شرعی اصولوں کے مطابق ہوں۔