ایامِ قربانی میں صدقہ کی نیت سے جانور ذبح کرنا

سوال

عرض یہ ہے کہ ہمارے معاشرے میں صدقات کے لئے ایک طریقہ یہ اختیار کیا جاتا ہے کہ لوگ اپنے مسائل و مشکلات میں آسانی، حاجات و مقاصد میں کامیابی اور بیماروں کی شفایابی کے سلسلے میں جانوروں مثلا بکروں وغیرہ کا صدقہ کرتے ہیں، چنانچہ جانور ذبح کر کے اس کا گوشت غریبوں، محتاجوں میں تقسیم کر دیا جاتا ہے ، یا خیراتی اداروں کو دے دیا جاتا ہے جبکہ بعض لوگ مدارس میں جمع کر واد دیتے ہیں۔آج کل اس مقصد کے لئے مختلف خیراتی اداروں کی طرف سے یہ سہولت دی گئی ہے کہ کوئی شخص صدقہ کےبکرے کی قیمت ان کے پاس جمع کروا دیں تو ادارہ اس کی طرف سے جانور ذبح کر کے اس کا گوشت غریبوں تک پہنچانے کی خدمت سر انجام دیتے ہیں۔

احسن الفتاوی (جلد نمبر 1، صفحہ نمبر ، 367، طبع یاز دہم، ایچ ایم سعید ) میں بیماروں کی شفایابی کے لئے جانوروں کے ذبح کرنے پر بدعت کا حکم مذکور ہے اور اس سلسلے میں عوام کے اعتقاد ( جان کا بدلہ جان سمجھنے ) کی وجہ سے اس سے منع کیا گیا ہے اگر چہ کوئی شخص یہ عقیدہ نہ رکھتا ہو تو بھی اس میں چونکہ اس عقیدے اور بدعت کی تائید ہے لہذا نا جائز ہے۔ (مفہوم)

اس سلسلے میں آگاہ فرمائیں کہ:
1. کیا بیماروں کی طرف سے جانور کو ذبح کرنا مطلقاً منع ہے ؟ یا کچھ شرائط کی رعایت کرتے ہوئے اس کی گنجائش ہو سکتی ہے؟

2. اگر کوئی شخص بیمار کی صحت کے لئے کسی غلط عقیدے کے بغیر محض صدقہ کی نیت سے کوئی جانور مدرسہ میں جمع کروائے تو کیااہل مدارس اس کو قبول کر سکتے ہیں ؟

3. ایک سوال یہ ہے کہ ایک شخص بیمار ہے ، اس کا والد اس کی طرف سے بطور صدقہ بکرا یا کوئی اور جانور ذبح کر کے گوشت تقسیم کرنا چاہتا ہے تا کہ صدقہ کی برکت سے اللہ تعالیٰ ان کے بیٹے کی بیماری میں شفاء اور آسانی کا معاملہ فرمائے ، کیا اس مقصد کے لئے قربانی کے دنوں میں جانور ذبح کیا جا سکتا ہے؟ یا ایام ِقربانی کے دن گزرنے کے بعد جانور ذبح کرنا چاہئے؟

جواب

(1) ۔۔۔واضح رہے کہ صدقہ کے لیے شرعاً جانور ذبح کرناضروری نہیں، بلکہ ہر جائز اور حلال مال سے کسی بھی ضرورت مند کی حاجت کو پورا کیا جا سکتا ہے اور اس کا بہتر طریقہ یہ ہے کہ نقد ر قم صدقہ کی جائے تاکہ غریب آدمی کی جو بھی ضرورت ہو وہ اس سے پوری کر لے۔ جان بچانے کے واسطے جان کے بدلے جان کےصدقے کا اعتقاد کرنا اور یہ سمجھنا کہ جان کے عوض جان دینے سے جان بچے گی ورنہ نہیں، یہ اعتقاد بھی خلافِ شرع ہے، ایسے عقیدے سے توبہ کرنی چاہیے اور شریعت میں صدقہ کے واسطے کوئی خاص چیز مقررنہیں ہے۔ تاہم بیماری سے شفاء یابی کےلئے جانور ذبح کر ناشر عا ًمطلقا ممنوع نہیں، لہذا اگر مذکورہ بالا فاسد عقیدہ نہ
ہو تو جانور ذبح کرنا جائز ہے۔ (مستفاد من تبویب:42/2030،90/1)

(2) ۔۔۔ صدقہ کی نیت سے دیا گیا جانور اہل ِمدارس قبول کر سکتے ہیں۔

(3) ۔۔۔ صدقہ کرنے کے لیے شرعا ًکوئی خاص دن مقرر نہیں بلکہ سال میں کسی بھی دن صدقہ کیا جاسکتاہے لہذا قربانی کے ایام میں بھی صدقہ کی نیت سے بکرا ذبح کر سکتے ہیں۔